Héctor González Seras
MA JURIA INCHAMANI FEBRERO KUTSÏ JIMBO P’URHÉPECHA JIMBANI UÉXURHINI K’UINCHIKUA ÚKUARHIXATI MÁNDANI UÉXURHINI, 1983 UÉXURHINI UÉRATINI, MÁRU JUCHARI KUERAAKATECHERI ERATSIKATA JIMBO, TS’ÏMANGAKSÏ UANDANIAJKAJUCHARI MÍMIXEKUA AMBE K’UIRIPERANI KA UINASKUNTANI.
ESÏKA NA JAPA P’URHECHERI JURHIATIKUA MIIUKUA, JIMBANI UÉXURHINI INCHASÏNDI TSIMANI JURHIATIKUA ERANDIMANI FEBRERU JIMBO, JIMBOSÏ K’UÍNCHITSKUA ÚKUARHTI MA JURHIATIKUARHU UÉRATINI KA TSIMANI JURHIATIKUA ERANDEMAKUARHU JAMBERI. JIMBANI UÉXURHINI JATANANTASÏNDI JIMBANI CHPÍRI TAXATAKUA JIMBO, ENGA ACHA K’ÉRI KURHIKAKUANI ERANASKAJKA (ENGA ÍSÏTU MÍTINACA ESÏKA “CIRICAVERI”); XÁSI ERATSIKUA JIMBO, IÁSÏ JAMBERI UÁNIKUA JUCHARI IRETECHARHU ISÏ KANDELARIA ANDAMUTAKUARHU CHURIKUA TATAKA SAPIRHATICHASKSÏ KURHIRASÏNDI K’UINIK’UMANCHIKUA.
NÓTKI MÍTIKUARHISÏNDI NÉNAMINDU JARHASÏKI JUCHARI JIMBANI UÉXURHINI MIIUKUA, JOPERU I JÁSÏ K’UÍNCHINTSKUA JUCHARI IRETECHANI IRENGURHPETARA ANTASÏNDI, TAJPANARHITA APARINI PAUANI PAUANI ANAPU AUANDANETECHANI; ISÏ SÉSI TÁNGUARHINTSKUA JINDESTI MA ANDANGUKUARHIKUA; ÍSÏTU UÉKANASÏNDI JUPIA ANTA KA ÚRAANTANI JUCHARI MÍMIXEKUECHANI.
MA TSAKAPU TS’IUNNTSÏ CHARHANDAERI, T’ÁPURU KÓNARHITI, JIMBANI UÉXURHINI K’UÍNCHINTSKUAERI K’ÉRI MANDAESTI. JIMA ÚNARHIKUNASÏNDI KÚÍNCHINTSKUA ÚKUARHIKATA ERANARHIKUA, TSAKANARHIKUNASÏNDI IRETERI MÍNDA KA K’UÍNCHINTSKUA MIIUKUA; IMANI JINGONI UÉNAKURHISÏNDI, ENGA UANOPITANAJKA IMANI K’UMANCHIKUA UÉRATINI ENGA PATSATANAJKA MA UÉXURHINI, KA IMANI JINGONI K’AMARHUSÏNDI, JÍENI ENGA T’ERUNCHIKUA MÓJTSÏTANAJKA.
TERUXUTINI UÉRATINI UÉNASÏNDI NIÁRANANI JUCHARI K’UIRIPU TÁCHANI ISÏ ANAPUECHA, KA ESÏKA NA INCHATERUPAJKA KA CHÚRIKUA JAMBERI ISÏ SÁNDERU NIÁRANASÏNDI: KÚSTATICHA, MÁMARU JÁSÏ UARHARICHA, PIRERICHA, CH’ÁNARICHA, KA ÚTASÏ AMBE, ENGA JINDEEKA JUCHARI JATSIJPAKUARHIKUA AMBE.
ISÏTU KÁSKUNASÏNDI MÁTERU MÁMARU JÁSÏ MÍMIXEKUA NIÁTAKUA AMBE, ESÏKA EXERPIKUA AMBE KA JUCHARI KA K’UÍNCHIKUERI MÍNDA UANDAJTSÏKPEKUECHA, ESÏKA: CHPÍRI, JUCHARI ANAJKUKUA, TSAKAPU, KA ÚTASÏ AMBE. MÉNICHANI KÁSKUNASÏNDI SAPIRHATICHERI MÍNDAKATA NIÁTAKUA AMBE.
IRETA JIMANGA ÚKUARHKA K’UÍNCHIKUA SÉSI EROPISÏNDI KA T’IRERPISÏNDI K’UIRIPU P’ORHEMPERINI; IÁMINDU IRETA JARHOAJPISÏNDI.
MÁRU KUTSÏCHA O JURHIATIKUECHA ANDAMUTAKUARHU ISÏ, O JAMBERI K’UINCHIKUARHUMINDU, P’URHE IRETECHARHU ANAPU JURAMUTICHA KA K’UIRIPUECHA ENGAKSÏ TSÍPKA I JÁSÏ ERATSIKUA AMBE XANATANI, KURHAJKUARHISÏNDIKSÏ T’ERUNCHIKUA.
P’URHÉPECHA JIMBANI UÉXURHINIRI KÚNGUARHIKUA JARHOAJPERICHA – ENGAKSÏ TÁNGUARHINTAJKA K’UÍNCHIKUARU K’AMARHUKUARHU ISÏ KA UANDATSEJKA ESÏKA NA NIRANI JARHAJKA K’UÍNCHIKUA ÚKUARHIKUA- ERAKUANTASÏNDI T’ÉRUNCHIKUA KURHAJKUARHIRICHANI; JIMA ERAKUNASÏNDI NÁKI IRETA ÚNTAA MÁTERU UÉXURHINI JIMBO P’URHÉPECHA JIMBANI UÉXURHINI K’UÍNCHINTSKUA; IMANI IRETANKSÏ MÍNDASÏNI ENGA NOTKI MÉNI ÚNTAJKA I JÁSI K’UÍNCHIKUA.
P’URHECHAJKUKSÏ JÁNGUARHISÏNDI ÚNTANI INI K’UÍNCHIKUA (NO NÉMANI UÉRAKUA ANAPUNKSÏ KURHAKUÏNDI JARHOAJPEKUA); ISÏ JIMBO T’ERUNCHITKU MÍTISÏNDI O UANDANIASÏNDI KÁSKUNI KA ÚNTANI INI K’UÍNCHIKUANI, JARHOATAKUARHIPARINI IMERICHERI JINGONI, IRETA KA KÚNGUARHIKUA JARHOAJPETICHA JINGONI.
I K’UÍNCHIKUA P’URHÉPECHA IRENGURHPETARANTSKUESTI, JUCHARI UINAPERANTSKUESTI, JIMANGAKSÏ IÁMINDU P’URHECHA SÉSI ERONANTAJKA, JANANARHPEPARINKSÏ JUCHARI TÁCHANI JÁSÏ ERATSIKUA AMBE; NÓKSÏ KUÁRHUKUASÏNDI O CHÚANTASÏNDI TURHISÏCHANI O MÁTERU UÉRAKUA ANAPU K’UIRIPUECHANI.
KA JIMBOKA P’URHECHERI K’UÍNCHIKUAEKA, JUCHARKU KATAMBA O UANDAKUA ÚRANASÏNDI; ISÏ PAKATPERAKATA JARHASTI ESÏKA P’URHÉPECHA JIMBANI UÉXURHINI NIÁTAKUARHU UANDAKUA ÚRANAAKA.