Morelia, Michoacán, 21 de febrero del 2023.- Secretaria de Educación del Estado (SEE), sesi nitamasti anchikua jorhenkuarhiriri Monserrat Zavala, Universidad Tecnológica de Morelia (UTM) anapu, jimpoka i kotsikua jimpo nitamaka uarhakuarhu Break Dance “Break For Gold” kotsikuarhu Japón.
Iuritskiri 21 uexurhikua jatiri uantontskuarhisti juramutichankuni na enki nitamaka jima enki jaka, ka sesi erankuntasti k’uiripchakua juramutiri Gabriela Molina Aguilar, jimpoka jarhoataka tuminankuni imanki marhoakuaka enki niuaka uarhani Japón.
Kuimu k’uiripuechajku kotsikuarhu anapuecha jintedtisï enki santaru sani urhajkasi imani Break Dance niuatisï imarhu Break for Gold Japón, ka ixuesti enki sesi nitamakua xarharajka jorhenkuarhiri Monserrat Guadalupe Zavala Cahue, Biotecnología UTM anapueri.
Jintesti tumpicheri enki santaru sesi uarhajkasi, kotsikuarhu anapuecha. Sapitku jorhentanasti uarhani, ka jimposï secundaria arhikatarhu tachani na jorhentanati uarhani, ka imanki santaru tsitika jintesti Break Dance, ka sesi usïnti jimpoka uantanajka enki tatakechajku ujka ini uarhani.
Monserrat Zavala, najki sesi uarharika ka anchitika sesi nitamasïnti jorhemperakuarhu jimpoka 9.9 petasïnti jorhenkuarhikuarhu Biotecnología, ka uekasïnti jorhenkuarhini na enki uaka mojtakuni eratsekua k’uiriperakuaeri.
SEE menki jauenasïnti tumpichampu enki pauani pauani sesi jorhentajkasï, ka jorhperichampu enki jorhentauakasï. Ka isï enki ima Monserrat Zavala, uanekua jarhastisï enki i iurhistkiriri menki jauenajkasï jarhoatani ka uetarhesïnti enki isï menki jauenanaka jimpoka jorhempeni Ukuesti Iamintuecheri.
